十多日大假，其中五日去左台北，主要為影結婚相。
成日聽見別人在香港影結婚相，又貴，又受氣，要少D相都比面色你睇，果D宮廷式實景，又唔靚又老土，所以很早已經決定要去台灣影，唔比錢香港人賺。
第一日去到，先揀衫。我只有兩套黑色同白色的禮服，款式好鬼一般，好彩一早由香港帶左幾件衫褲，以及在租結婚當日禮服的公司，借左兩set領呔同背心過去，唔使加錢upgrade。女友就有兩套婚紗加四套晚裝，完全唔使著自己衫！做女仔幾好，男女真係唔平等！！
借完衫，晚上同攝影師溝通。我地未去台灣，已經參考過好多人地的結婚相，包括我視為影得最正的美寶結婚相，print左好多張samples比攝影師睇，同佢講明想去邊個景，同要什麼feel。我地最主要的要求，就係唔好影咁多正面，要影多D側面同背面，見唔到個樣最好！！因為我地對自己個樣真係冇乜信心！！
第二日，正式影相，但天氣不好，作落雨，心情涼了一截，不過都冇計。
晨早去到舖頭，化妝、set頭，搞左個幾鐘。見到自己化左妝個樣，勁唔慣，好想嘔。
化好妝，先在室內影，攝影師不斷叫我地擺好多高難度的pose，因為冇經驗，成日比佢話唔自然！！唉，你估我地係model咩，要熱身架嘛！！
影左個幾鐘，換好衫，終於出發外拍！！我、女友、攝影師同佢的女助手，搭一早預備好的靚靚的士，向目的地進發。
我們先到了陽明山腳一個花園拍花，然後上了陽明山頂影高樹林，再到海邊的風車屋、洋荳子餐廳、三芝海灘、貝殼餐廳，換了不知多少套衫，影到黃昏。
雖然落雨，但都係在我們搭車時落，去到景點就唔落，算係不幸中的大幸。之前很想影日落，不過天氣不好，沒有鹹蛋黃，但陽光在雲中射出的晚霞，卻有另一番感覺！！
天黑後，拖著疲乏同肚餓的身軀，坐上的士，立即訓著，攝影師就再帶我地去淡水一條行車隧道裡面影多幾張埋尾，一天的攝影工作完成，只剩半條人命！！
第三天，下午到舖頭揀相。第一次睇番自己化左妝個樣，同兩個人擺哂pose的相，覺得好嘔心，唔係好多張揀得落手！！不過部份相片卻比想像中正，例如晚霞的那輯，雖然冇日落，但晚霞卻有天地蒼茫的感覺；在隧道那幾張都幾好feel；做鍾意就係在陽明山樹林影的那輯，夠自然。結果揀了六十多張，比預算多了。
其實影相之行雖然辛苦，成日比攝影師善意的鬧，但成個過程都幾開心，台北北岸的風景真係好靚，影相的同時又可以遊覽，真係唔錯。
最奇妙既，係同我地一齊同日影相的一對couple，竟然係同我地同一日擺酒，仲要係同一間酒樓的不同分店，真係蹺到暈！！我地仲要係同一日到台灣，同一日影相，同一日揀相，同一日在西門町撞見，仲同一日返香港！！咁有緣。

------------------------------------------------------------------------------------------------------------------------------------------------------------------------------------

我都好想去台灣影婚紗相呀~~~~~~~~~~